Årsmelding

for

Værlandet Vel

2005

Styret og nemndene i Værlandet Vel 2005

I 2005 har vi hatt årsmøte, eitt allmøte, eitt ekstraordinært årsmøte, tre møte i lag med styret i Bulandet grendalag og åtte vanlege styremøte.

Værlandet Vel har delteke på rutemøte på Askvoll rådhus den 23. februar.  Ruteplanar og kommunikasjonar har vore eit emne som vi har arbeidd med gjennom heile året, spesielt rutetilbodet til Alden har vore eit gjennomgåande tema.

Vi var òg til stades på profileringsseminaret på Askvoll den 2. mars, der Værlandet vart representert på ein framifrå måte ved å vise filmen som ho Laila Blom har laga om bygda vår.

I mai vart det arbeidd mykje med den nye reguleringsplanen til Brimmen Quarry.

I juni reiste Gry, Astri, Linda, Elin og Erna til Jostedalen for å delta i avslutninga av Naturbruksprosjektet. Her fekk vi høve til å presentere Værlandet  og  våre særeigne utfordringar for over 80 byråkratar frå heile landet. Vi fekk gehør for at styresmaktene bør ta tak i søppelproblematikken i Sørværet.

Første helga i juli feira vi oss sjølve med den sokalla ”Nordsjøporthelga” som også denne gongen vart ein suksess.

Vidare har vi fått på plass ein ny hjartestartar som er plassert på Værlandet. Bygdefolk og verksemder har vore flinke til å bidra til denne.

Værlandet Vel har vore så heldige at vi har motteke ein betydeleg arv frå Peder Hansen. Arven omfattar bua og alle museumsgjenstandane som han har samla opp igjennom åra.

I haust hadde vi besøk av studentar frå universitetet på Ås som skulle studere naturvern og naturbruk.

I september reiste Astri, Linda  (og Jardar frå Bulandet) til Skottland for å møte samarbeidspartnarane våre der. Det var ein svært lærerik og motiverande tur. Målet med samarbeidet er at vi skal dele og dra nytte av erfaringane som det å bu i ein utkant i Europa fører med seg.

Første helga i desember kom skottane på gjenvisitt. Etter formelle møte og presentasjonar i gamleskulen  vart dei med på julebord i ungdomshuset. Sundagen vitja dei steinindustrien..

Framover:

Vi har mykje arbeid som skal gjerast med det nye museet. Vi har kontakt med fleire ressurspersonar i den eldre garde som vil hjelpe oss med dette. Vi ser også føre oss at vi skal få hjelp frå Kystmuseet i Florø til dette arbeidet.

Vi planlegg ei ny Nordsjøporthelg i lag med Bulandet. Det vert første helga i juli. Denne gongen vert marknadsdagen i Værøyhamna på laurdagen.

Vidare vil samarbeidet med Skottland og Shetland vere noko som vi ser fram til i året som kjem.

Rutearbeidet og arbeidet med å få kommunikasjonar til Alden kjem til å halde fram også i år.

12.02.06, Styret.